ਜਲੰਧਰ ਦੇ ਸ਼ਿਵਲੋਚਕ ਦੀਪ ਦੀ FIH ਅੰਤਰਰਾਸ਼ਟਰੀ ਪੈਨਲ ਵਿੱਚ ਚੋਣ; ਹਾਕੀ ਜਗਤ ਵੱਲੋਂ ਮਾਣ ਮਹਿਸੂਸ

ਬਿਊਰੋ (ਗੋਲਮਾਲ ਨਿਊਜ਼) : ਜਲੰਧਰ ਦੇ ਸ਼ਿਵਲੋਚਕ ਦੀਪ ਨੇ ਅੰਤਰਰਾਸ਼ਟਰੀ ਹਾਕੀ ਫੈਡਰੇਸ਼ਨ (FIH) ਦੇ ‘ਇੰਟਰਨੈਸ਼ਨਲ ਪੈਨਲ’ ਵਿੱਚ ਬਤੌਰ ਤਕਨੀਕੀ ਅਧਿਕਾਰੀ ਸ਼ਾਮਲ ਹੋ ਕੇ ਜ਼ਿਲ੍ਹੇ ਦਾ ਨਾਂ ਰੌਸ਼ਨ ਕੀਤਾ ਹੈ। ਸ਼ਿਵਲੋਚਕ ਇਸ ਸਮੇਂ ਚੰਡੀਗੜ੍ਹ ਵਿਖੇ ਪ੍ਰਧਾਨ ਮਹਾਲੇਖਾਕਾਰ (ਆਡਿਟ) ਹਰਿਆਣਾ ਦੇ ਦਫ਼ਤਰ ਵਿੱਚ ਸਹਾਇਕ ਆਡਿਟ ਅਫ਼ਸਰ (AAO) ਵਜੋਂ ਸੇਵਾਵਾਂ ਨਿਭਾ ਰਹੇ ਹਨ।

ਸ਼ਿਵਲੋਚਕ ਦੀਪ ਦਾ ਅਹੁਦਾ ਉਨ੍ਹਾਂ ਦੇ ਸ਼ਾਨਦਾਰ ਤਜ਼ਰਬੇ ਦਾ ਨਤੀਜਾ ਹੈ। ਉਹ ਹੀਰੋ ਏਸ਼ੀਆ ਕੱਪ 2025 (ਰਾਜਗੀਰ), ਜੂਨੀਅਰ ਏਸ਼ੀਆ ਕੱਪ 2024 (ਮਸਕਟ), ਸੁਲਤਾਨ ਆਫ਼ ਜੋਹੋਰ ਕੱਪ (ਮਲੇਸ਼ੀਆ) ਅਤੇ FIH ਪ੍ਰੋ ਲੀਗ ਵਰਗੇ ਵੱਡੇ ਟੂਰਨਾਮੈਂਟਾਂ ਵਿੱਚ ਤਕਨੀਕੀ ਅਧਿਕਾਰੀ ਵਜੋਂ ਸੇਵਾਵਾਂ ਦੇ ਚੁੱਕੇ ਹਨ। ਰਾਸ਼ਟਰੀ ਪੱਧਰ ‘ਤੇ ਉਹ ਨੈਸ਼ਨਲ ਗੇਮਜ਼ 2025 (ਉਤਰਾਖੰਡ) ਵਿੱਚ ਬਤੌਰ ਟੈਕਨੀਕਲ ਡੈਲੀਗੇਟ ਅਤੇ ਹਾਕੀ ਇੰਡੀਆ ਲੀਗ ਸਮੇਤ ਝਾਂਸੀ, ਲਖਨਊ ਅਤੇ ਬੰਗਲੌਰ ਦੀਆਂ ਸੀਨੀਅਰ ਨੈਸ਼ਨਲਜ਼ ਵਿੱਚ ਵੀ ਆਪਣੀ ਕਾਬਲੀਅਤ ਸਾਬਤ ਕਰ ਚੁੱਕੇ ਹਨ।

ਸ਼ਿਵਲੋਚਕ ਦੀਪ ਦੀ ਸ਼ਾਨਦਾਰ ਸਫਲਤਾ ‘ਤੇ ਹਾਕੀ ਇੰਡੀਆ ਦੇ ਮੀਤ ਪ੍ਰਧਾਨ ਅਤੇ ਹਾਕੀ ਪੰਜਾਬ ਦੇ ਪ੍ਰਧਾਨ ਤੇ ਆਪ ਜਲੰਧਰ ਸੈਂਟਰਲ ਹਲਕਾ ਇੰਚਾਰਜ ਨਿਤਿਨ ਕੋਹਲੀ ਨੇ ਸ਼ਿਵਲੋਚਕ ਦੀ ਤਕਨੀਕੀ ਮੁਹਾਰਤ ਦੀ ਸ਼ਲਾਘਾ ਕਰਦਿਆਂ ਉਨ੍ਹਾਂ ਨੂੰ ਵਧਾਈ ਦਿੱਤੀ। ਸੁਰਜੀਤ ਹਾਕੀ ਸੁਸਾਇਟੀ ਦੇ ਅਹੁਦੇਦਾਰਾਂ—ਵਰਕਿੰਗ ਪ੍ਰਧਾਨ ਐਲ.ਆਰ. ਨਈਅਰ ਤੇ ਲਖਵਿੰਦਰ ਪਾਲ ਸਿੰਘ ਖਹਿਰਾ, ਸੀਨੀਅਰ ਮੀਤ ਪ੍ਰਧਾਨ ਆਰ. ਪ੍ਰਤਾਪ, ਜਨਰਲ ਸਕੱਤਰ ਸੁਰਿੰਦਰ ਸਿੰਘ ਭਾਪਾ, ਸਕੱਤਰ ਰਨਬੀਰ ਸਿੰਘ ਟੁੱਟ ਅਤੇ ਸੀ.ਈ.ਓ. ਇਕਬਾਲ ਸਿੰਘ ਸੰਧੂ—ਨੇ ਇਸ ਪ੍ਰਾਪਤੀ ‘ਤੇ ਮਾਣ ਮਹਿਸੂਸ ਕੀਤਾ। ਭਾਰਤੀ ਹਾਕੀ ਟੀਮ ਦੇ ਸਿਲੈਕਟਰ ਓਲੰਪੀਅਨ ਬਲਵਿੰਦਰ ਸਿੰਘ ਸ਼ੰਮੀ ਨੇ ਕਿਹਾ ਕਿ ਸ਼ਿਵਲੋਚਕ ਦਾ ਇਹ ਸਫ਼ਰ ਨਵੇਂ ਆਉਣ ਵਾਲੇ ਅਧਿਕਾਰੀਆਂ ਲਈ ਇੱਕ ਚਾਨਣ ਮੁਨਾਰਾ ਹੈ।